Чарговыя паседжаньні Клубу па актуальных пытаньнях гісторыі 3-га і 10-га лістапада, прысьвечаныя 410-годдзю Берасцейскай уніі, адбыліся, як звычайна, у аўдыторыі 44 гістарычнага факультэту БДУ, але былі досыць незвычайныя.

Па-першае, яны былі аб'яднаныя праз супольную тэму;

па-другое, яны адбыліся з інтэрвалам у тыдзень (а ня ў два, як звыкла);

па-трэцяе, яны спалучалі элементы як традыцыйнае дыскусыі, гэтак і дэбатнае мэтодыкі.

Частка І адбылася ў пятніцу, 3 лістапада. Яна сутыкнула ўспрыманьні Вуніі з бакоў праваслаўнага - спн.Натальля Гарковіч, студэнтка 5-курсу Інстытута тэалогіі БДУ, і вуніяцкага - сп.Яўген Усошын, гісторык. З прысутных 32 асобаў 12 былі студэнтамі Інстытута тэалогіі БДУ, якія прыйшлі падтрымаць сваю каляжанку і пункт гледжаньня праваслаўных.

Дэбаты адбываліся ў досыць гарачай форме, пераходзячы ад багаслоўскіх успрыманьняў да гістарычных тлумачэньняў. Гэтаму нямала паспрыяў і прысутны выступоўца другой часткі (што адбывалася 10 лістапада) сп.С.Акіньчыц.

Частка ІІ, што прайшла, адпаведна, 10 лістапада, прыцягнула ўвагу 21 слухача, пераважна, гісторыкаў і тэолягаў. Выступоўцы - сп.Міхаіл Папоў, гісторык, і сп.Станіслаў Акіньчыц, таксама гісторык, паспрабавалі спыніцца на каталіцкім і пратэстанцкім чыньніку тых даўніх падзеяў.

Спрэчка атрымалася больш цікавая, чым у І частцы, нават нягледзячы на тое, што сп.Папоў даволі хутка вычарпаў свой запас аргумэнтаў і пасьля некалькіх пытаньняў пагадзіўся з тэзамі суразмоўцы.

Пытаньняў з аўдыторыі было багата ў васноўным да сп.Акіньчыца.

А напрыканцы, дзеля падсумаваньня па тэме, былі зробленыя два міні-апытаньні сярод прысутных: хто з выступоўцаў трымаўся лепей, і ці прынесла вунія станоўчых вынікаў на Беларусь. Слухачы адзначылі падрыхтаванасьць і дасьціпнасьць сп.Акіньчыца, а таксама выказаліся скэптычна штода станоўчага выніку "экумэністычнага" экспэрымэнту ХVI стагодзьдзя.

Колькасць каментароў (0) - Ваш каментар: